أجواء رمضان في الايام الاولي من شهر رمضان المبارك
في أول أيام رمضان لما بنحاول ونقربها من الروح بتظهر فلسطين بشكل تاني فلسطين اللي بتتنفس قرآن
وبتلبس فرحة وبتعيش رمضان بطعم مختلف.
من بعد صلاة الفجرالشوارع بتهدى لحظة وكأنها بتستعد ليوم صيام طويل مليان بركة
ريحة الخبز الطالع من الفرن البلدي وصواني الكعك والمعمول اللي بتنحط ع الرفوف بتحكي إن رمضان وصل.
البياعين في الأسواق الشعبية من غزة للضفة بيعلقوا فوانيس بسيطة ع أبواب محلاتهم وبيحطوا تمر وقمر الدين وقطايف
بواجهة المحل كأنهم بيستقبلوا ضيف عزيز.
في القدس أول جمعة في رمضان إلها طعم خاص الطرقات المؤدية إلى المسجد الأقصى بتمتلئ بالمصلين من الصبح
وا جوّ الساحة هناك صوت التكبير ولمّة الناس بتحسسك إن الروح الجماعية أقوى من أي ظرف
وقت العصر البيوت بتبلش تتحرك. الأمهات بتحضر السماقية أو المقلوبة أو المسخن وكل بيت إله نكهته الخاصة. الأولاد بيعدّوا الدقايق ع أذان المغرب واقفين مستنيين اللحظة اللي ينطلق صوت الأذان من مآذن
ولما يأذن المغرب الكل بيقول “الله أكبر” بنفس واحد. أول رشفة مي وأول تمرة إلها معنى عميق
وكلمة “صيامًا مقبولًا” بتتكرر بمحبة صادقة.
0 Comments